Wednesday, January 13, 2010

SKUAD 69 NGUTUK ULAH NYERANG GERIJA

January 13, 2010, Wednesday

Sida madahka penyanggup diri deka begandin enggau gerempung bukai nyaga pengelikun gerija di menua tu

KUCHING: Skuad 69 Polis Diraja Malaysia (PDRM) Sarawak ti ngutuk pengawa bala orang nyerang sereta nunu gerija, besedia begandin enggau gerempung ukai perintah (NGO) nyaga pengelikun rumah Tuhan nya di menua tu.Seketari Besai iya, Abdul Rahman Hashim madahka insiden tauka pengawa nyerang gerija ke terubah iya diripot nya chukup ngemaluka sereta enda patut nyadi di menua Sarawak.

Lalu enggau nya ia mega ngarapka kes baka tu ulih diputar enggau jampat.

“Kami berasai enda lantang ati lebuh ti ninga berita tu laban ngelamatu kitai sama nemu menua tu chukup likun taja pan diwan pupu raban bansa sereta jalai pengarap.

“Nya alai kami sigi enda besetuju enggau pengawa ti baka tu lalu sedia deka begandin enggau NGO nyaga penglikun rumah sembiang ba menua tu,” ku iya.

Iya mansutka jaku tu lebuh ti dikerandau Utusan Borneo pasal pekara tu ba opis iya kemari.

Kelimpah ari kes ti nyadi ba Semenanjung bisi siti gerija ba Miri mega udah pechah bekau ti ditikau ngena batu.

Berebak enggau tu, skuad tu ngarapka semua jalai pengarap ba menua tu tau duduk sama lalu berunding ngiga jalai kena mutarka pekara tu ti tau ngeratka penyerakup antara semua jalai pengarap ba menua tu, ku iya.

“Kami ba Skuad 69 tu mayuh pupu raban bansa sereta jalai pengarap ti enda sebaka, tang nadai kala bisi penanggul begulai enggau pangan diri lalu bebasaka pengarap urang bukai,” ku iya.

(Petikan dari akhbar Utusan Borneo, 13 Januari 2010)